الارهاب

الارهاب 

هاشيل بؤجة هدومي على ضهري وارحل في يوم 

لابس جلابيه وسديري والشال يداري الهموم 

وامسك في ايدي ربابه واحكي حكاية شعب 

دي حكاية ليها العجب وانت المعين يارب 

اول ماهبدي كلامي راح اقول ياهادي 

تكرمني لجل النبي بالرزق لولادي

ناديت صميدة وده جاري ومعانا ابو بشندي 

ورحنا يامة هناك ع الكوبري بنعدي 

لقينا سياح كتير يجي خمسميت ميه 

انا قولت يامرحبا بضيوف كتير جايه 

ولحظة جتلي فيران نزعق كما الغربان ورصاص في كل مكان 

صرخت قولت في ايه ماتقولي ياابن العم 

قال الوليد ياخال غرقت ايدينا دم 

يامصر ياام النيل ياام الهرم والسد 

قوليلي دولا مين ماتردي يابلادي 

قالت بصوت مخنوق معرفش فيهم حد 

رضعوا لبن شياطين مش هما اولادي 

تبكي القلوب ياخي من غير رموش وجفون 

لو كانوا دول عاقلين يبقى انا المجنون

مديت ايديا مسكت العصايا ..رفعت على كتفي ديل العبايا 

مشيت مدنجر دماغي عمال اكلم في روحي 

ليه انكتب علينا نعيش ايام كلها اسيه 

وليه فتحي ولدي بعد العلام واقف على الناصيه 

مين اللي علم مين .. فين اللي عين فين 

وازاي شباب ملايين يبقوا كده عاطلين 

كلمات / سيد الرميلي